Departamenti për Çështje Juridike (DÇJ)

Në bazë të Rregullores për Organizimin e Brendshëm dhe Sistematizimin e Vendeve të Punës Nr.01/2016 (neni 22 dhe neni 23), e miratuar në bazë të nenit 3 dhe 37 të Ligjit nr. 05/L-019 të Ligjit për Avokatin e Popullit, është paraparë formimi dhe funksioni edhe i Sektorit i hulumtimit dhe Shërbimit Juridik si dhe Departamentit për Çështje Juridike.

 

Sektori i Hulumtimit dhe Shërbimit Juridik

 

• Detyrat dhe përgjegjësitë e sektorit janë:
• Shqyrton dhe analizon zbatimin e legjislacionit primar dhe sekondar, si dhe të standardeve dhe rekomandimeve të mekanizmave vendor dhe ndërkombëtare, në fushën e mbrojtjes, mbikëqyrjes dhe promovimit të të drejtave dhe lirive të njeriut.
• Përgatitë propozime, paraqet iniciativa dhe rekomandon nxjerrjen e ligjeve të reja në Kuvend, dhe/apo ndryshimin e ligjeve që janë në fuqi dhe nxjerrjen apo ndryshimin e akteve nënligjore dhe administrative nga institucionet e Republikës së Kosovës.
• Jep rekomandime të përgjithshme për funksionimin e sistemit të drejtësisë, në veçanti të sistemit gjyqësor, pa ndërhyrje në rastet dhe në procedura tjera ligjore që janë duke u zhvilluar para gjykatave, përveç rastit kur ka zvarritje të procedurave.
• Inicion çështje në Gjykatën Kushtetuese në pajtim me Kushtetutën dhe Ligjin për Gjykatën Kushtetuese.
• Ofron shërbime të mira të gjithë banorëve të Republikës së Kosovës si dhe personave të tjerë që ndodhen jashtë territorit të Republikës së Kosovës.

Sektori i hulumtimit dhe shërbimit juridik drejtohet nga njëri prej zëvendësve të Avokatit të Popullit të caktuar nga Avokati i Popullit.

 

Sektori i Hulumtimit dhe Shërbimit Juridik përbëhet nga Departamenti për Çështje Juridike.

 

Departamentit për Çështje Juridike(DÇJ)

 

Detyrat dhe përgjegjësitë e Departamentit për Çështje Juridike janë:

 

• Kryen hulumtime dhe analizon zbatimin e ligjeve, rregulloreve dhe të standardeve dhe rekomandimeve të mekanizmave vendor dhe ndërkombëtare, në fushën e mbrojtjes dhe promovimit të të drejtave dhe lirive të njeriut.
• Përgatitë dhe shpreh opinione në procesin e përgatitjes së projektligjeve dhe rregulloreve të tjera, të cilat kanë të bëjnë me mbrojtjen e të drejtave dhe lirive të njeriut.
• Përgatitë rekomandime për nxjerrjen e ligjeve të reja në Kuvend, ndryshimin e ligjeve që janë në fuqi dhe nxjerrjen apo ndryshimin e akteve nënligjore dhe administrative nga institucionet e Republikës së Kosovës.
• I rekomandon Kuvendit dhe Qeverisë së Kosovës harmonizimin e legjislacionit me standardet ndërkombëtare për të drejtat dhe liritë e njeriut, si dhe zbatimin e tyre efektiv.
• Inicion në Gjykatën Kushtetuese çështjen e përputhshmërisë me Kushtetutën të ligjeve, të dekreteve të Presidentit e të Kryeministrit, të rregulloreve të Qeverisë dhe të Statutit të Komunës.
• Ofron këshilla dhe jep rekomandime çdo personi fizik dhe juridik lidhur me pajtueshmërinë e ligjeve dhe akteve nënligjore me standardet e pranuara ndërkombëtare për të drejtat dhe liritë e njeriut.
• Këshillon dhe rekomandon autoritet e Republikës së Kosovës për programet dhe politikat e tyre për të siguruar mbrojtjen dhe avancimin e të drejtave dhe lirive të njeriut në Republikën e Kosovës.
• Fillon një procedim administrativ ose merr pjesë në të në mënyrë që të mbrohen interesat publike, të cilat mund të preken nga një procedim administrativ.
• Fillon konfliktin administrativ, në mbrojtje të interesave publike, në rast se konsideron se me aktin administrativ është shkelur ndonjë e drejtë apo ndonjë interes i drejtpërdrejtë ose i tërthortë, i bazuar në këtë ligj.
• Informon organin kompetent për fillimin e hetimeve penale, nëse gjatë hetimeve vëren se ka elemente të veprës penale.
• Inicion ngritjen e procedurës, me pëlqimin paraprak të parashtruesit të cilit i janë shkelur të drejtat dhe liritë e njeriut.
• Fillon procedurën me iniciativë të vetë lidhur me shkeljen e të drejtave dhe lirive të një numri më të madh të qytetarëve, të fëmijëve apo personave me aftësi të humbura veprimi.
• Jep rekomandime të përgjithshme për funksionimin e sistemit gjyqësor, pa ndërhyrje në rastet dhe në procedura tjera ligjore që janë duke u zhvilluar para gjykatave, përveç rastit kur ka zvarritje të procedurave.
• Paraqitet në cilësinë e mikut të gjykatës (amicus curiae) në proceset gjyqësore që kanë të bëjnë me të drejtat e njeriut, çështjet e barazisë dhe mbrojtjes nga diskriminimi.
• Ndihmon edhe me anë të ndërmjetësimit dhe pajtimit, në procesin e mbikëqyrjes dhe mbrojtjes së të drejtave të njeriut.
• Ndihmon qytetarët për realizimin e së drejtës për qasje në dokumentet e nevojshme të cilat u janë refuzuar dhe në realizimin e papengueshëm të së drejtës për qasje në dokumente publike.
• Departamenti udhëhiqet nga drejtori i departamentit, i cili i përgjigjet dhe raporton Avokatit të Popullit dhe zëvendësi i Avokatit të Popullit.