12 janar 2012 – Institucioni i Avokatit te Popullit (IAP) sot, ditë e enjte ka vendosur kutitë e reja të ankesave në Qendrën korrektuese dhe të paraburgimit në Lipjan. Ndërkaq, të premten me 13 janar, kutitë do të vendosen edhe në burgun e Dubravës .
Kutitë e vendosura ofrojnë mundësinë që personat e ndaluar të mund të shprehin ankesat apo kërkesat e tyre drejtuar Avokatit të Popullit. Hapja e kutive të ankesave bëhet vetëm nga IAP.
Kjo iniciativë është ndërmarrë me qëllim të përtrirjes së kutive të vendosura më parë nga ana e IAP-së , disa nga të cilat janë dëmtuar për arsye nga më të ndryshmet. Këtë vit është bërë një shtrirje më e madhe në kuptimin e vendosjes së këtyre kutive, ku përfshihen edhe vendet e tjera të mbajtjes së personave të privuar nga liria: stacionet policore, në qendrat e paraburgimit në Prishtinë, Lipjan, Gjilan, Pejë, Mitrovicë dhe Prizren, në burgun e Dubravës dhe atë të Smrekovnicës, shtëpitë e shëndetit mendor, azilet e pleqve, shtëpitë në komunitet për personat me aftësi të kufizuara mendore, shtëpitë e fëmijëve me aftësi të kufizuara mendore etj.
Në këto kuti, ankesat e tyre drejtuar Avokatit të Popullit mund t’i vendosin edhe personeli i punësuar në këto qendra ku vendosen kutitë, por gjithashtu edhe familjarët e personave që mbahen aty.