23 shkurt 2012 – Institucioni i Avokatit të Popullit (IAP) ka pranuar ankesë nga një banor i fshatit Dardhishtë të komunës së Kastriotit, lidhur me shkarkimin e elementeve ndotëse nga Korporata Energjetike e Kosovës (KEK), në pronën e tij.
Me ftesën e IAP-së drejtuar Inspektoratit Mjedisor dhe të Ujërave në Ministrinë e Mjedisit dhe Planifikimit Hapësinor, si dhe Institutit Hidrometeorologjik, ekspertët përkatës bashkë me këshilltaren ligjore të IAP-së, znj. Valbona Puka Gola, kanë dalë në vendin e ngjarjes.
Ekspertët kanë vërejtur se në pronën e palës që është ankuar dhe në zonën përreth ka tejkalim të parametrave të lejuar të ndotjes së ujit, ajrit dhe tokës, nga shkarkimet e vazhdueshme të KEK-ut. Ngjyra e zezë dhe e hirtë mbi tokën, borën e kulmet shihet gjithandej. Sipas pohimeve dhe deklaratave të inspektorëve mjedisorë të MMPH-së, arsyeja e një ndotjeje të tillë është shkarkimi i gazrave nga tymtarët e termocentralit, si dhe bartja e hirit nga depoja e hirit dhe shkarkimi i tyre, në përroskën pranë, si dhe rishkarkimi i materialeve toksike në lumin Sitnica. Po ashtu, përveç shkarkimit të fenolit që i tejkalon vlerat normale, ka edhe ndotje me metale të rënda. Nga ekspertët e Institutit Hidrometeorologjik u morën mostrat e ujërave, për të dalë në ditët në vazhdim me rezultatet e gjendjes së ujit.
Me qëllim të mbrojtjes dhe sigurimit të jetës dhe shëndetit të qytetarëve, si dhe pengimin dhe evitimin e faktorëve ndotës, është e domosdoshme ndërmarrja e masave emergjente për të ndaluar degradimin e mëtutjeshëm mjedisor.