25 nëntor 2011 – Me rastin e shënimit të Ditës për eliminimin e dhunës ndaj gruas, Avokati i Popullit, z. Sami Kurteshi i shoqëruar nga bashkëpunëtorë të tij , ka vizituar sot Qendrën për Mbrojtjen e Grave dhe Fëmijëve, ku është pritur nga drejtoresha e kësaj strehimoreje, znj. Naime Sherifi.
Drejtoresha e kësaj Qendre ka njoftuar Avokatin e Popullit për vështirësitë dhe gjendjen e rëndë financiare me të cilën përballet kjo Qendër, por edhe 7 Qendrat tjera të cilat funksionojnë në kuadër të Koalicionit të Strehimoreve të Kosovës, me qëllim të bashkëveprimit dhe rritjes së kualitetit të shërbimeve për viktimat.
Znj. Sherifi ka përmendur me theks të veçantë sfidat që kanë sidomos në procesin e referimit të rasteve dhe reintegrimit të tyre. Gjithashtu ajo theksoi edhe komunikimin e mangët ndërmjet nivelit qendror të pushtetit dhe atij lokal sa i përket mbrojtjes dhe trajtimit të viktimave të dhunës. Sipas drejtoreshës së kësaj Qendre, gjatë këtij viti, vetëm në Prishtinë kanë strehuar 57 raste, viktima te dhunës në familje.
Avokati i Popullit, z. Sami Kurteshi ka shprehur gatishmërinë e Institucionit që ai udhëheq që të ndihmojnë në këtë drejtim, qoftë përmes ndihmës në aspektin ligjor, qoftë monitorimit, por siç tha ai të shihen edhe mundësitë e një bashkëpunimi edhe më konkret për të pasur trajtim adekuat të këtyre rasteve dhe për të ndikuar që të arrihen rezultate pozitive në këtë drejtim.