Pas marrjes së informatave nga burime të ndryshme rreth mënyrës së jetës së komunitetit rom në Mitrovicën veriore ku dyshohet se pjesëtarët e këtij komuniteti jetojnë në një hapësirë me përmbajtje të mëdha toksike, Institucioni i Ombudspersonit ka filluar hetimet ex-officio (te bazuara mbi dyshime).
Informatat në posedim të Institucionit të Ombudspersonit tregojnë se shumica e popullatës që jeton në Mitrovicë kanë sasi të mëdha të plumbit në gjak, duke i përfshirë edhe paqëruajtësitë e NATO-s. Kurse, komuniteti rom është padyshim më i rrezikuari pasiqë jetojnë nëpër vende pranë hedhurinave të plumbit nga miniera e Trepçës. Niveli i plumbit tek ta llogaritet të jetë 3-4 herë më i lartë se tek pjesa tjetër e popullatës.
Ekzistojnë dyshime të supozuara se numri i romëve që kanë vdekur si pasojë e prezencës së madhe të plumbit në gjak është i madh kryesisht tek moshat rinore imuniteti i të cilëve është më i dobët.
Rezultatet e hetimeve nga ana e Institucionit të Ombudspersonit do të bëhen publike për opinionin e gjërë sa më shpejtë që të jetë e mundur së bashku me rekomandimet për organet kompetente për marrjen e masave të duhura.