Në fillim të vizitës së tij në Kosovë, Kryesuesi i Komitetit të ministrave të Këshillit të Evropës njëherësh edhe Ministër i punëve të jashtme i Sllovakisë Jàn Kubiš është takuar me Ushtruesin e detyrës së Ombudspersonit z. Hilmi Jashari me qëllim të njohjes për së afërmi me punën dhe aktivitetet e Institucionit të Ombudspersonit.
Gjatë takimit me zyrtarët e lartë të Institucionit të Ombudspersonit Z. Kubiš ka shfaqur interesim veçanërisht mbi punën dhe aktivitetet e Institucionit që nga koha kur është transferuar në duar të stafit vendor.
Ushtruesi i detyrës së Ombudspersonit z. Hilmi Jashari, Zëvendësi i Ombudsperosnit Ljubinko Todorovic dhe Drejtori i hetimeve Veton Vula e kanë informuar z. Kubiš për rezultatet e arritura të Institucionit si dhe për vështirësitë që ka hasur gjatë këtij procesi.
Ministri Kubiš, vlerësoi lartë përkushtimin e Institucionit të Ombudspersonit për avancimin e të drejtave të njeriut në Kosovë, mirëpo shfaqi brengat për moszbatim adekuat të rekomandimeve që dalin nga ky Institucion drejtuar Kuvendit dhe pushtetit në Kosovë, gjë e cila ishte vlerësuar edhe në raportin e Komisionit Evropian lidhur me Kosovën.

Duke shprehur kënaqësi me nivelin e besimit të të gjithë qytetarëve të Kosovës ndaj Institucionit të Ombudspersonit, z. Kubis potencoi rëndësinë e ruajtjes së pavarësisë së këtij Institucioni dhe premtoi përkrahje për të gjitha fushat për punën e Institucionit të Ombudspersonit në Kosovë në të ardhmën.