Me qëllim të ofrimit të një zgjidhje të përshtatshme juridike, pas një debati të gjatë dhe pakënaqësive të shprehura lidhur me punën e Komisionit Qeveritar për njohjen dhe verifikimin e statusit të veteranëve të Ushtrisë Çlirimtare të Kosovës, Avokati i Popullit ka publikuar sot një opinion në lidhje me procedurat e ankimimit të vendimeve administrative lidhur me këtë çështje.

Më 1 qershor 2016, Qeveria e Republikës së Kosovës pati miratuar Vendimin nr. 05/90, me të cilin ka aprovuar raportin e Komisionit Qeveritar për njohjen dhe verifikimin e statusit të dëshmorit të Kombit, invalidit, veteranit, pjesëtarit apo të internuarit të Ushtrisë Çlirimtare të Kosovës, duke miratuar evidencën e prezantuar nga Komisioni dhe duke  e lënë të hapur shqyrtimin dhe miratimin e Listës përfundimtare, në të ardhmen.

Në Opinionin e tij, Avokati i Popullit konstaton se Vendimi në fjalë, nuk është në pajtim me legjislacionin në fuqi dhe së këndejmi shkel të drejtat e procedurës së rregullimit të statusit të veteranit të luftës.

Avokati i Popullit e konsideron të nevojshme që Qeveria e Republikës së Kosovës të rishikoi punën e Komisionit Qeveritar sa i përket dispozitave ligjore përkitazi me respektimin e afateve kohore, mungesa e të cilave e pamundëson të drejtën e ankimimit kundër vendimit të nxjerrë nga Komisioni Qeveritar për Njohjen dhe Verifikimin të Statusit të Dëshmorit të Kombit, Invalidit, Veteranit, Pjesëtarit apo të Internuarit të Ushtrisë Çlirimtare të Kosovës. Përcaktimi i afateve mundëson të drejtën e ankimimit në Gjykatën kompetente, ashtu siç e parasheh Ligji për Konfliktet Administrative, qëllimi i të cilit është mbrojtja gjyqësore e të drejtave të personave fizik dhe juridik, interesa këto që mund të jenë cenuar me vendime individuale ose me veprimet e organeve të administratës publike.

Së këndejmi, Avokati i Popullit e konsideron të nevojshëm ndryshimin e Rregullores mbi Komisionin Qeveritar, sa i përket dispozitave që përcaktojnë afatet kohore për nxjerrjen e vendimeve të Komisionit Qeveritar, pas ankesës dhe përcaktimit shprehimor të natyrës së vendimeve  të Komisionit të Posaçëm për rishqyrtim të ankesave (vendosja përmes aktit përfundimtar administrativ).

Po ashtu, Avokati i Popullit e sheh të nevojshëm ndryshimin e Rregullores mbi Komisionin Qeveritar edhe në aspekt të përbërjes së Komisionit të Posaçëm për rishqyrtim të ankesave. Aktualisht, anëtarët përzgjidhen nga radhët e anëtarëve të Komisionit Qeveritar, të cilët po ashtu kanë marrë vendimin në shkallë të parë, gjë që nuk paraqet alternativën e duhur.

Opinioni në formën e tij të plotë, u është përcjell sot mediave dhe i njëjti mund të gjendet në web faqen zyrtare të IAP-së: Kliko këtu